Eg elskar å skape og formidle, og håpar du blir både inspirert og velsigna!

​

Eg er født i 1971, sunnmøring, busett i Molde. I oppveksten sat eg ofte og såg på når far min måla. Det var til stor inspirasjon for meg, og eg tok mellom anna med meg inspirasjonen inn i arbeidet med kreative fag på skulen.

​

Dei første penselstroka tok eg først i 2004, inspirert av fargerike måleri i vennekretsen. Bestillingar frå venner og kjente har gitt meg motivasjon til å fortsette.

​

Den kristne trua mi har stor betydning for meg, og motiverer og inspirerer meg til å formidle, m.a. gjennom kunsten. Eg likar godt å bruke ord frå Bibelen og andre tekstar med kristent bodskap – nokre gongar ved å skrive tekst på måleriet, kombinert med fin struktur, gode fargenyansar og ev. eit motiv. Andre bilete vel eg å ikkje skrive tekst på, men gi ein tittel som eg skriv på baksida av lerretet. Eg likar også å måle intuitivt, og ikkje nødvendigvis ha eit konkret bodskap å formidle.

​

Hausten 2020 melde eg meg endeleg på eit online malekurs, med ønske om å lære nye teknikkar og få inspirasjon til å vidareutvikle meg. Også i 2021 deltok eg på eit online malekurs innen abstrakt kunst. Å delta på desse kursa har gitt meg ein spennande periode, som eg har fått stor glede av! Eg brukar framleis akryl, målar mest abstrakt, og elskar å bruke diverse mixed media (modelling paste, heavy gel medium, universalmedium, bister), for å få fram spennande strukturar. Variasjon og kombinasjon av teknikkar er kjekt!

 

Eg finn også inspirasjon i å sjå på flotte måleri, og gjerne observere mens eit måleri vert til. Det fantastiske skaparverket er også til stor inspirasjon.

​

Reiskapar og teknikkar eg brukar er mellom anna penslar og palettknivar i ulike størrelsar, svamp, sparkel, sjablongar (kjøpte eller sjølvlagde), silkepapir og handlagd papir. Eg målar sjeldan på store lerret pga. lite lagringsplass, men tek gjerne imot bestillingar i alle størrelsar!